ازاي تاخد أول خطوة في طريق راحة البال

عايز تعرف أول خطوة عشان توصل لنفسية هادية ومرتاحة.. عشان تخلص من الاكتئاب والقلق ..

وتعرف تحل مشاكلك أول بأول وتعيش الدنيا عادي وانت مبسوط وراضي؟

كلمة واحدة بس هي التقبل Acceptance.. كلمة بسيطة وسهلة.. وتبان منطقية جدا.. بس في الحقيقة تنفيذها مش بسهولة نطقها ولا بلطافة وقعها في وداننا..

خليني أقوللكم مثال واضح أوي لل acceptance وبعدها نطبق الموضوع ده على جوانب الحياة التانية..

فيه حاجة اسمها مراحل الفقد.. لما حد يموت قريب مننا.. او حد يعرف مثلا إنه في مرحلة متقدمة من المرض وانه قد يموت مثلا.. أو أي مصيبة كبيرة فيها خسارة أو فقد شديد.. بنعدي بخمس مراحل من الحزن والأسى.. تبدأ أولا بالإنكار والعزلة.. اللي هو لأ ما تقولوش مات.. ده ماماتش أكيد أنا بحلم .. أكيد فيه علاج لحالتي..

تاني مرحلة هي الغضب:.. تبقى زعلان من الدكتور اللي شخص والاخ اللي اتأخر .. وساعات من الشخص اللي مات نفسه.. وبعدها غضبان من نفسك انك غضبان!

المرحلة التالتة.. الجدال والفصال: لو كنا عملنا .. لو كنا جيبنا.. لو كنا رحنا للدكتور التاني.. لو انا كنت ما سمعتش كلامهم وعملت كذا و كذا.. وساعات بتقلب بإحساس بالذنب رهيب.. وده يدخلنا على المرحلة اللي بعدها..

الاكتئاب.. الحزن والمرارة الشديدة.. دي اللقطة اللي انت فيها بتحس بكل الوجع والفقد والمرارة.. والزهد في الدنيا..ومش بتروح غير لما نوصل للمرحلة الأخيرة.. اللي هي التقبل.. تقبل الحقيقة كلها على بعضها زي ما هي.. ان فلان مات.. وانك لوحدك.. وان الدنيا عمرها ما هتبقى زي الأول.. كله اتغير .. وكله اختلف.. وفي اللقطة دي برضو.. انت بترجع لحياتك عادي وبتبتدي تتعامل مع الامر الواقع.. ومع مرور الوقت تبتدي حدة الحزن ومرارة الفقد يقلّوا كتير مش شرط يختفوا.. بس الحياة ترجع عادية من تاني!

نرجع بقى لمواقف الحياة العادية .. اللي كلنا طول الوقت فيها.. طول الوقت عندنا مشاكل وتحديات وحاجات نقصانا وضغوطات.. عادي دي الدنيا يعني.. ماحدش ما عندوش هذا النوع من التحديات... مثلا.. فيه ستات مش مبسوطة من ازواجهم .. ورجالة مش راضيين عن مراتتهم .. وبنات مش متقبلة عدم الجواز.. العيال عندهم مشاكل.. شخصيتي ونفسيتي فيهم عيوب معجزاني..ظروفي.. فقري.. مرضي.. أبويا أمي.. عيلتي.. شغلي.. سفري.. غربتي.. امكانياتي.. امكانيات اللي حواليا.. امثلة كتير لا حصر لها..

لو عايزين نوحد حل لكل المشاكل دي .. يبقى كلمة السر التقبل.. لو قدرت توصل للمرحلة دي بسرعة وبشكل سليم نفسيا .. انت كدة حطيت إيدك على اول الخيط لحل مشاكلك أيا كان نوعها..

لكن إيه اللي بيحصل في الحقيقة وكلنا بنقع في الغلطة دي؟ إنك تفضل (متعلق) في مرحلة من المراحل السابقة بالشهور والسنين.. وساعات عمرك كله!! متخيلين عمرك كله في مشكلة مش عارف تفلفص منها!

زي مثلا.. المرحلة ألأولانية...إنك تنكر وجود المشكلة من أساسه .. رغم إنك متبهدل منها.. وبتعاني من جواك ولكن تفضل تكابر وتنكر وجودها أصلا.. خصوصا لو انت عامل أساسي فيها.. ست عيالها عاملين مشاكل ومتأخرين دراسيا وطوب الأرض بيشتكوا منهم.. وهي تفضل تعيب على المدرسة والمدرسين والمجتمع المتخلف.. يمكن عشان لو اعترفت حتى قدام نفسها إنها مقصرة.. يبقى الخطوة اللي جاية إنها تبذل مجهود عشان تصلح ده.. وهي يمكن مش عايزة ده دلوقتي أو مش قادرة عليه.. لو بس تقبلت إن عندها مشكلة.. هتعرف تلاقي حل وهتلاقي ميت حد يساعدها.. بس هي اختارت تدفن راسها .. وتنكر لآخر نفس! .. يبان إنها ريحت نفسها بس في الحقيقة هي سايبة نفسها وسايبة عيالها والناس كلها تعاني!!

المرحلة التانية.. الغضب.. إنك تبقى ناقم على غيرك غالبا أو على المجتمع كله في مشكلة انت واقع فيها.. مثلا مش بتشتغل.. فتقضي وقتك كله بتشتم وتعيب في الظروف والبلد وأصحاب الشركات والشغلانات كلها.. وتقنع نفسك واللي حواليك إن المشكلة مش فيك لأ ده في الناس اللي ما بتفهمش اللي محاوطينك في كل مكان.. واحدة غضبانة من جوزها عشان مش متعاون وللا عصبي وللا مهمل.. بتقضي وقتها كله في الخناق والزعيق والهجوم عليه .. وانت السبب وانت وانت.. ما بنكرش عليها إن ده ممكن يكون حقيقي.. بس الفكرة إن لو ما تقبلتش مشكلتها وشيليتها زي ما هي كدة عمرها ما هتعرف تخلص من الهم ده.. لكن بقى اول ما تتقبل اللي هي فيه هتبتدي تدور على حلول.. تشوف بقى هتعمل إيه.. هتروح لحد يساعدها في علاقتهم وللا هتطنش عشان حاجات تانية وللا هتتطلق وتخلص.. أيا كان الحل إيه.. هي معمية عن كل الحلول بالغضب والازدراء واللوم.. أعرف ناس قاعدة بقالها أكتر من 20 سنة في المرحلة دي!

المرحلة التالتة.. تبقى عارف إنك فيك العيب الفلاني أو عندك النقص العلاني..عادي كبني آدمين.. دي من خصائصنا يعني!.. وتفضل بقى تفرك وتجادل وتتسائل .. ساعات والله بالسنين ولا إنك تعترف بده قدام نفسك وتتكل على الله وتشوف هتظبط حياتك ازاي.. تقابل مثلا 100 بني آدم وكلهم يتفقوا إن انت شخص كئيب ومحبِط وصُحبتك ماهياش لطيفة أوي غير لما بتفكها شوية.. أو مثلا لما يكون حد قريب منك أوي فعارف ومقدر الجوانب الحلوة التانية اللي في شخصيتك وبالعك كلك على بعضك كدة.. وانت بقى طول الوقت .. على الفيس بوك.. الستيتس بتاعتك حاجة من الاتنين.. يا بتمارس كئابتك وبتنشر طاقتك السلبية وبتنقد كل حاجة في الوجود .. لو بتشير صورة طفل بيضحك.. تكتب فوقيها الواد ده بيضحك على إيه هو مش حاسس بالقرف اللي احنا فيه؟! والنوع التاني من الستيتس.. هو انا يا جماعة مش ظريف.. هو انا مش لطيف؟! هو ليه الناس مش بترد على تليفوناتي.. ليه الناس بقت وحشة كدة.. فين الصحاب .. فين الاخوات.. فين الحيوانات.. جدال وفصال كتيييير .. لحد ما تخبط في حد يديك المقلب اللي هوا.. يمكن تفوق وتدرك حقيقتك وهنا بقى.. يا إما تسمع كلامي وتتقبل فكرة إنك عندك المشكلة الفلانية .. وتبتدي تفكر هتحسنها ازاي.. او انك تكمل حياتك وانت عمال تتساءل وتجادل وتفاصل.. وضاع العمر يا ولدي!!

المرحلة الرابعة.. إنك تفضل زعلان أو مكتئب بسبب حاجة مش عندك أو حاجة فقدتها أو حتى حد فقدته.. ما تفهموش كلامي غلط.. مش معنى كدة إن الواحد ما يزعلش على من فقد.. بس يا جماعة ( ولا تهنوا ولا تحزنوا) الاكتئاب بيخليك مش عارف تشوف حياتك.. وربنا لما ابتلاك.. كان الغرض من الابتلاء ده إنك تعدي منه عادي في الدنيا تتعلم وتتوجع وتنجح في الاختبار وتشوف اللي بعده وتثاب عليه دنيا وآخرة.. لكن في حالة إنك قعدت متعلق في المرحلة دي.. انت خلاص مش بتعرف تشوف باقي حياتك وتأدي فيها .. وده في الأصل هو الغرض اللي انت اتخلقت عشانه.. والاكتئاب دوايره المفرغة كتير لو ما طلعتش منه بإرادتك.. هتتوحل زيادة! وبرضو كلمة السر.. انك تتقبل خسارتك وتتقبل وجعك وألمك ووجع قلبك.. وتبلع ده واحده واحدة عشان تعرف تشوف حياتك.. و ت move on

فيه برضو .. الإحساس بالذنب وجلد الذات.. تفضل بس عمال تلوم في نفسك على غلط أو تقصير.. وشكرا على كدة لا بتحل المشكلة ولا عارف تسامح نفسك ولا تحبها وبالتالي حياتك واقفة على إنك غلطت أو قصرت!

عايزين بقى أول ما نقع في مشكلة أو نلاقي نفسنا في تحدي جديد من تحديات الدنيا أو ندرك عيب من عيوبنا.. اول حاجة تفكر فيها هي الكلمة دي.. التقبل.. هل أنا متقبل اللي حصل.. الفقد.. العيب اللي فيا .. العيب اللي في غيري.. التقصير.. الذنب.. غبائي .. عيوبي..فقري.. تعبي.. مسؤولياتي.. حياتي كلها زي ما هي كدة وللا لسة بقاوح وبفلفص؟.. ويا ترى أنا محتاج أعمل إيه تاني أوأفهم تفاصيل إيه عشان أتقبل.. عادي .. ساعات الواحد بيبقى محتاج وقت ومعلومات كتير لحد ما يهدى ويتقبل ويرضى بالوضع الجديد! ندي لنفسنا فرصة.

عارف أول ما تتقبل وترضى كدة.. هتلاقي مليون حل ومليون طريقة تطلع فيها من المشكلة اللي انت فيها.. زي ما تكون غشاوة واتشالت.. صدقوني الحاة لسه فيها كتير.. حاجات حلوة .. وتحديات جديدة.. اقلب وشوف اللي بعده!