ازاي تنفدي بجلدك من علاقة مسيئة
أكتر قصة بقيت بسمعها دلوقتي في دايرة أصحابي وأقربائي و بحكم شغلي طبعا .. قصة ال abuse .. ترجمتها بالعربي الإساءة .. بس بحس إن كلمة abuse معبرة أكتر من مجرد إساءة.. وبقول قصة لأنها فعلا قصة واحدة مع اختلاف التفاصيل..
تبقى البنت داخلة على الجواز كدة ورده مفتحة.. وفاتحة قلبها للدنيا كلها.. بالنسبة لها هي دي اللقطة اللي ممكن بعدها تحقق أحلام عمرها ما كانت هتعرف توصل لها غير بعد ما تتجوز (من وجهة نظرها طبعا).. تتجوز حد عشان يبقى لها أقرب مخلوق في الدنيا ليها.. يبقوا هما الاتنين كأنهم واحد .. بس في جسدين .. وساعات من شدة القرب بيبقوا كأنهم جسد واحد... علاقة كلها مودة ورحمة.. هنا وراحة بال.. هو ربنا وصفها كدة.. وبعدها ييجوا العيال .. ينوروا حياتهم زيادة ويقعدوا هم الاتنين يعافروا مع بعض في الدنيا عشان يوصلوا بمركبهم لبر الأمان..
صورة تقريبا واحدة مزروعة في خيال كل بنت ... ليه بقى يتحول الحلم الجميل ده لجحيم من هذا النوع..
واحدة جوزها بيضربها ويلويلها دراعها (حرفيا) ويجرجرها في الأرض.. يطردها من بيتها.. ويشتمها هي وأهلها.. ده نوع كلاسيكي أوي لل abuse
وحدة جوزها بيذلها ويتحكم فيها باسم الدين.. ما تخرجيش.. ما تتكلميش .. ما تزوريش.. اعملي اللي بقوللك عليه من غير نقاش.. يا كدة يا تبقي واحدة ناشز.. وانا غضبان عليكي والملايكة هتقعد تلعن فيكي..
واحدة جوزها بيطلع عقده النفسية كلها عليها.. يمكن عشان هي أعلى منه في جانب من الجوانب.. أحسن منه مثلا علميا.. يسيبها شغلها ويقفل عليها كل السكك اللي ممكن تفك فيها عن نفسها ودايما يحسسها إنها تبقى مجرمة لو فكرت تشتغل .. والله حتى لو هتعمل عمل خيري!
واحد كان نفسه يتجوز واحده بس اترفض كتير .. منها أو من أهلها .. يفضل ساكن ومخزن لحد ما يتقفل عليهم باب.. ويبدأ بقى يذل فيها ويهينها هي وأهلها .. ويمنعها عنهم .. ويحاول يكرهها فيهم..
واحدة جوزها بيقصد يذلها ويمنع عنها العلاقة عشان عارف انها نفسها تخلف .. مفيش مبرر تاني للمنع.. غير إنه يذلها.. تخيلوا..
وواحده بيتعمل لها غسيل مخ.. انت ما تعرفيش تعيشي من غيري.. أنا الوحيد اللي مستحملك ومستحمل أهلك.. ممكن البنت تبقى شايفة نفسها مش جميلة مثلا.. أو ما تقدرش تصرف على نفسها.. فتبقى يا عيني مصدقاه انها ما تعرفش تعيش من غيره.. وهو حقيقي بني آدم مريض.. وبيستغل ضعفها ده فإنه يمارس ال abuse بتاعه.
واحدة جوزها بيلوي دراعها بالعيال.. ياخد عيالها منها.. أو يهددها بده..
واحدة جوزها بيعمل لها abuse بإنه ما يصرفش عليها لأنه عارف إنها ضعيفة ومش هتقدر تعمل حاجة.. ويقوللها مش عاجبك .. اخلعيني.. أو ادفعيلي فلوس واتنازلي عن كل مستحقاتك... يا لهوي!!
واحدة جوزها بيلسوعها بالكلام رايح جاي.. يحقر منها.. ومن أهميتها في حياته وفي حياة عياله.. لأ في الدنيا كلها.. يفهمها إنها غبية.. كسلانة .. معتمدة عليه.. ضعيفة.. مالهاش ضهر.. يحقر من إنجازاتها ورأيها .. وكلامها كله.. بيستهزأ وبيتهكم طول الوقت على كل كلمة وكل تصرف يطلع منها..
واحدة جوزها ما بيحسش .. نهائي.. لا يشيل منها عيل .. ولا يراعيها في كلمة ولا يعمل حسابها في حاجة.. لو اتألمت أو نزفت قدامه.. عادي يخش ينام .. وهي تكلم أهلها ييجوا يودوها المستشفى!!
واحد يذل مراته عشان غلطة عملتها.. أو يذلها عشان حد من أهلها عمل غلطة هي مالهاش دعوة بيها ..
واحد يذل مراته عشان تخينة.. مش على سنجة عشرة زي فلانة وعلانة.. عشان مش بتعمل له اللي نفسه فيه بالتنتوفة.. يقعد في الرايحة والجاية يقطم فيها .. ويحسسها دايما إنه مش راضي عنها
الأمثلة كتير والله .. حبيت بس أقول بعضها عشان اللي بيحصل معاها كدة .. تاخد بالها إنها في علاقة مسيئة.. لازم تهرب منها في أقرب وقت.. وعلى فكرة غالبا الزوج المسئ بيبقى كومبو.. بيعمل كذا حاجة من اللي فاتت إن ما كانش كلهم!!
يمكن بس المثال الأخير اللي ممكن أشوفه لوحده .. يبقى الراجل كويس في كل حاجة إلا في لقطة إنه ما بيرضاش أبدا!! وده ليه حلول تانية..
التحليل الرئيسي للأزواج المسيئين دول.. هو انهم بيبقوا psychopath.. سيكوباتيين... أشرار في داخلهم.. ما بيحبوش حد.. بيكرهوا الناس.. بيتلذذوا بعذابهم.. ما بيندموش.. ما بيتأسفوش.. ما بيرتدعوش!!
مالهمش حل .. غير إنك تختفي من سكتهم.. وتبعد عن أذاهم..
طبعا فيه أسباب تانية.. زي البني آدم الشكاك.. اللي دايما شايف الناس كلها وحشة .. وبيتآمروا عليه.. عشان يأذوه أو يستغفلوه.. وبما إن الناس وحشة فنعاملهم وحش وننتقم منهم...
أو حب للسيطرة.. أو أمراض نفسية وقلبية كتير.. غيرة.. دونية.. غل..أيا كان.. بس للأسف الستات الكيوت .. الهاديين اللي يبانوا ضعاف كدة..وعايزين يلموا الدور.. دول الضحية المفضلة عند ال abusers ..
المشكلة بقى ازاي تعرفي تطلعي من علاقة مسيئة كدة.. يعني هم في السِّلم أصلا أشرار وحقيرين مابالك بقى لما تستفزيهم أو تتحديهم!!
النقط الجاية دي هي من وجهة نظري أهم حاجات تاخدي بالك منها وانت في طريقك للهروب..
1- ما تقوليش لبابا وماما.. عارفة ان كتير مش هيعجبهم الكلام.. بس لو انت وصلتي لقرار انك مش هتكملي مع البني آدم ده.. شكوتك لأبوكي وأمك ممكن تعمل مشكلة كبيرة.. إما يحاولوا يهدوا الأمور عشان يلموا الدور.. وساعتها إنت أكيد هتتعرضي لاستغلال وإساءة تاني .. ويمكن أكتر من الأول لأنه عرف إنك لوحدك.. أو هيزعلوا ويغضبوا جدا ويروحوا يتعاملوا معاه بعنف أو تهديد.. وبرضو هينتقم منهم فيكي.. مهما مضيتوه على تعهدات.. ( ممكن تقوليلهم لو متأكده إنهم عندهم من القوة والنفوذ إنهم يطلقوكي من الراجل ده في التو واللحظة ومن غير ديول.. أعرف ناس راحوا خدوا بنتهم بعفشها بورقة طلاقها يوم ما مد إيده عليها.. غير كدة ماتحاوليش.. خصوصا لو عندك عيال.. لأن لسة سكة الانفصال طويلة)
2- خططي كويس أوي للخروج من العلاقة دي.. امتى.. ازاي.. رتبي أولوياتك..عشان تعرفي وقت الجد هتسيبي إيه وتاخدي إيه. إيه مهم وإيه مالوش لازمة.. إيه هتتخلي عنه مقابل إيه.. تخيلي كل السيناريوهات واعملي حسابك عليها .. وجهزيلها حلول.. خليكي سابقة بخطوة.. لأ بخطوات ..
3-
اسألي طبعا مختصين في القضايا والطلاق والحضانة وكل المواويل دي.. الله يعينك.. اوعي تُقدمي على حاجة انت مش فاهماها!
4- اعملي في صمت.. ماحدش يحس بيكي هو بالذات.. ولا الناس اللي حواليكي.. اختاري بس حد مقرب وثقة يبقى معاكي في الحوار ده كنوع من الدعم.. ولو تقدري.. ماتقوليش لحد.. خدي بالك إن آراء الناس مختلفة.. اللغط الكتير هيلغبطك ويأخرك..
5- ما تستفزهوش.. ما تعاملهوش وحش.. النقطة دي والنقطة اللي قبلها مهمين.. عشان ما تطلعيش المارد اللي جواه وانت مش جاهزاله.. عشان لو طلع .. هيبوظلك كل خططك.. ممكن يمسك عليكي غلطة.. ممكن يسبقك بخطوة .. وخلي بالك انت مش هتقدري عليه وهو غضبان ومستفز.. بدليل إنك ما قدرتيش قبل كدة..
6- اقفي على رجلك.. أو على الأقل تبقي عارفة الخطوط العريضة بتاعة .. هتقعدي فين .. هتصرفي منين.. هتعملي إيه مع العيال.. سواء تربويا وللا ماديا.. ولا حتى هتقوليلهم إيه..
7- اتقي الله.. استعيني بالله.. ادعي ربنا كتير إنه يلهمك الصح ويكفيكي أذاه.
من وجهة نظري.. اهم نقطة في التعامل مع السيكوباتيين إن الواحد يبين دايما وجه السلام.. ما يعملش مشاكل مع حد يهوى المشاكل .. ما يشعللش عنده رغبة الانتقام ... يقلل الاحتكاك قدر الإمكان.. ينفد بجلده ويهرب بعيد..
كفانا الله وإياكم شر السيكوباتيين..
