عندما يتحقق الحلم
حلمي إني أعمل كورس للستات يتعلموا فيه يقضوا على الاكتئاب بنفسهم.. كان حلم واضح المعالم بقى له أكتر من سنة! كان حلم vivid كدة واضح فيه كل التفاصيل .. المكان اللي باعمل فيه الكورس ، شكل الناس اللي قاعدة قدامي .. عددهم .. صوتي.. آدائي .. ال topics ..القصص اللي هتتقال.. التوضيحات اللي بتتكتب.. وشوشهم اللي بتتحول من أول لحظة دخلوا فيها الكورس لآخر لحظة وهم بيسلموا عليا وماشيين!
كنت شايفاهم وهم داخلين مكشرين وشايلين الهم.. وهم بيبكوا متأثرين من حاججات بيحكوها أو حاجات بقولها.. كنت سامعة نبرة صوتهم وهم بيهاجموني وبيشككوا في اللي بقوله.. وكنت سامعاني برد عليهم بهدوء وتفهم.. لأني عارفة كويس إن الكلام جديد وفي بعض الأحيان مش سهل... كنت حاسة بقلبي وهو بيدق بسرعة من الفرحة لما واحدة فيهم تجرب حاجة من اللي قلتها وتيجي تحكيها قدام الناس وهي متفاجأه إن الطريقة دي نفعت.. حتى الربكة اللي بتجيلي في أول كام دقيقة من المحاضرة كنت عارفاها وحساها من قبلها بسنة!!
من قبلها بسنة كنت شايفاهم بعد الكورس وهم مبتسمين .. هاديين .. حاسين إن فيه أمل.. شايفين إنهم مش لوحدهم! عندهم همة وطاقة ما حسوش بيها من زمن.. فيه منهم اللي مش هيحتاجني تاني..لأنها خلاص لقت اللي محتاجاه.. وعرفت طريقها .. وفيه منهم اللي لسة هتكمل شوية .. بس حطت رجلها على أول الطريق خلاص!!
كتير لما كان بيسمع فكرتي ما كانش بيحس إنها ممكن تنفع!! كانوا شايفين إن ازاي واحدة مكتئبة بتجاهد عشان تقوم من السرير في المقام الأول هتيجي تحضر كورس 16 ساعة وتختلط مع الناس ومزاجها يتحسن كمان بناءا على اللي هيتقال.. لأ وكمان هتبذل مجهود في تنفيذ اللي اتعلمته وهي في المزاج السئ ده!
أول راوند من الكورس حضره معايا 29 سيدة .. كما تمنيت .. وتماما كما تخيلت .. فعلا حاسة بالرضا والسعادة إني حققت جزء من حلمي الكبير.. باحلم إن كل ست وبنت فعلا تعيش في رضا وسعادة وتبقى عارفة إزاي تدير حياتها وتواجه مشاكلها من غير ما تقع ضحية للاكتئاب أو القلق.. أو تبقى أسيرة لظروف صعبة أو مزاج سئ.. وتعرف تلاقي ده من غير تحتاس ..حلمي إنها تعيش مبسوطة وبتأدي رسالتها .. أيا كانت وفين ما كانت.
شكرا لكل حد وقف جنبي في السكة الطويلة دي وكان دعم ليا في حلمي حتى وهو مش شايف الصورة ومتخيلها زي ما انا شايفاها.
شكرا لكل واحدة حضرت معايا أول راوند.. وهي عارفة إن ده أول كورس من نوعه والله أعلم هينفع وللا لأ.. شكرا على الثقة.. شكرا على الآداء.. شكرا لحضوركم ومرونتكم في التعامل.. أنا بحمد ربنا إنه اختركم انتم بالذات عشان تنوروني في أول طلعة ل Back To Life
"وَقَالُوا الْحَمْدُ لِلَّهِ الَّذِي هَدَانَا لِهَٰذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ"
لو واحدة حابة تخوض معايا تجربة Back To Life قريبا تتابعني على اللينك ده >>>
