11 سبب قد يدفعك للجنون بعد الولادة!!
من أحب متع الدنيا للإنسان هي نعمة الأطفال والذرية الصالحة "المال والبنون زينة الحياة الدنيا".. المولود ييجي من هنا والدنيا تتملي فرح وسعادة مهما كانت الظروف.. ولكن الأم المسكينة ساعات ما بتلاقيش حد يحس بيها وبالصعوبات اللي بتعدي بيها في المرحلة دي .. في المقال ده هتتعرفي على أهم المشاكل اللي بتتعرض ليها الأم بعد الولادة وأفضل الطرق للتغلب عليها .. ولكن خلينا نتفق على حاجة الأول إن المفتاح الرئيسي لحل المشاكل دي هو التقبل .. يعني تتقبلي فكرة إنك بتعدي بمرحلة صعبة هتاخد منك وقت ومجهود وهتستهلك من طاقتك لأقصى حد وإن ساعات التعب والإجهاد النفسي والجسماني هيغلبوكي.. تقبلي ده وما تقلقيش كلنا كدة .. وأكيد لما تفتكري إن المكافأة هتببقى في الدنيا قبل الآخرة ده هيهون عليك كتير..
1-قلة النوم: طبعا دي أكبر مشاكلنا في المرحلة دي .. المعاناة بتوصل إن فعلا الواحد ممكن ما ينامش ساعتين على بعض في الكام شهر الأولانيين بعد الولادة.. الناس دايما هيقولولك نامي أول ما البيبي ينام وده فعلا حل معقول هو مش أحسن حاجة في الدنيا بس ما تقلقيش ربنا بيبارك والنوم القليل بيديكي دفعة من الطاقة لشوية من الوقت وفي كل مرة هتنامي فيها حتى لو حبة صغيرين هتصحي بعدها تقدري تأدي اللي وراك بشكل مقبول.. ولكن ده لا يمنع طبعا إن لو قدرت تنامي بتاع ست ساعات على بعض دي هتبقى حاجة رائعة.. اطلبي من حد إنه يشيل عنك شوية من حين لآخر..عايزاكي تعرفي حاجة مهمة إنك لما بتحاولي تعملي نظام للنوم في أول 4 شهور انت بتتعذبي ومش هتعرفي تحققي ده.. لأن البيبيهات ما بيبقاش لسة اتنظمت عندهم دواير النوم في المخ.. انت كدة بتقاومي.. وده هيتعبك أوي وعن تجربة...آه وحاجة مهمة أوي..ادعي ربنا كتير إنه يبارك في نومك ونوم البيبي.
2-بكاء الطفل المستمر: طبعا ده ليه أسباب كتير منها معروف ومنها مش معروف.. عارفة إن دي بتبقى أكتر حاجة محبطة وممكن دي لوحدها تدفعك للجنون وفي بعض الأحيان للانتحار.. بهرج طبعا.. بس فعلا الإحساس بالعجز إني مش عارفة المشكلة فين ومش عارفة ومش قادرة أتعامل معاها مع صوت الصريخ اللي ممكن لوحده يستخدم أداه للتعذيب المؤدي للوفاة كان بيخليني عايزة أصرخ بصوت عالي جدا يمكن البيبي تتخض وللا حاجة وتقول لنفسها إيه الهبل ده وتبطل.. وده طبعا ما بيحصلش.. الحل إيه بقى؟! اقري كتيروشوفي فيديوهات واسألي ناس كتير عن مشاكل البيبي وازاي تتعاملي فيها.. طرق مبتكرة عشان تسكتيه.. كل ما يبقى عندك معلومات أكتر كل ما حيلك هتزيد وهتلاقيكي بتسيطري على الموقف بشكل أكبر.. جربي تسمعي حاجة في ودانك تفصلك شوية عن صوت الزن.. استعيني بمرجيحة أو كرسي هزاز مثلا ... هاتي شيالة أطفال عشان تتمشي وانت شايلاه من غير ما إيدك وضهرك يوجعوكي.. البيبيهات بيسكتوا لما بتشيليهم وبتتمشي بيهم..يعني .. حاجات من هذا القبيل.. وما تنسيش.. اديه لباباه خليه يتمزج شوية.. بس ما تتفقعيش لما أبوه يشيله ويقوللك ماهو سكت اهو..إيه المشكلة بقى؟!
3-وجود أطفال تانيين: خصوصا لو لسة صغيرين أوي..أولا اطلبي مساعدة باباهم أو اللي معاكي في البيت.. ثانيا: حضري الطفل ده نفسيا قبلها..فيه نونة جاي..أخوك أو أختك.. اعملي معاه فقط اللي هتقدري عليه بعد ما تجيبي البيبي التاني..معظم الأمهات بتهتم زيادة قبل ما تولد وتيجي بعد الولادة ما تقدرش تعمل الروتين ده مع ابنها الكبير فالولد يبقى محبط أوي وحاسس انه محتاجك اكتر وانك اتخليتي عنه فيضغط عليكي أكتر.. من الآخر عوديه قبلها على القليل عشان ما يتعبش من الفرق بعد ولادتك..ثالثا: خليه يساعدك في حاجات بسيطة تخص البيبي.. رابعا: ودي مهمة أوي قضي معاه كواليتي تايم... وقت مخصوص ليه هو بس حتى لو عشر دقايق.. هيساعده إنه يحس إنه لسة بياخد حقوقه في البيت ده .. الهدف ان او عندك ولاد تانيين تبقى طلباتهم ملباه فيبقوا مبسوطين وبالتالي ما يضعطوش عليكي زيادة.
4-وجود البيبي بيتعارض مع مشاريعك الشخصية: زي مذاكرة..شغل ..بيزنس..أيا كان.. حل المشكلة دي أولا في التقبل إن ده وقت البيبي وإن مفيش مشكلة إن أولوياتك تتبدل مؤقتا في الفترة دي .. ثانيا ظبطي نيتك إن كل حاجة بتعمليها للبيبي ده وكل تعب تتعبيه ربنا هيفرحك بيه في ابنك وانت شايفاه بيكبر وربنا بينبتهولك نباتا حسنا وفي الآخرة لما ربنا يرفعك بعملك ده درجات في الجنة..ثالثا: مش معنى إن جزء كبير من وقتك هيروح لصالح البيبي الجديد إنك تقفي في مكانك وما تعمليش حاجة ليكي..قبل الولادة اقعدي مع نفسك وحطي خطط منطقية تنفذيها في الوقت ده.. وجربي حلول ذكية لانجاز جزء من مشاريعك..زي انك تاخدي كورسات أون لاين في البيت ..تقري حاجات كنت عايزة تقريها أو تسمعي محاضرات وانت بتعملي حاجات تانية في البيت.. سجلي بصوتك على موبايلك الحاجات اللي عايزة تعمليها قدام..تواصلي مع الناس اللي ماكنتيش عارفة تكلميهم وانت بتشتغلي.. وهكذا.
5-احساسك بانك متبهدلة: ده لوحده يكئب.. نصيحة مني لازم يبقى ليكي روتين للنظافة كل يوم شاور مثلا.. على أد ما تقدري دايما لبسك نضيف ريحتك حلوة شعرك مترتب ..اتزوقي يعني.. بس لنفسك.. لما هتبصي في المراية وتلاقي نفسك شكلك حلو هتنسي شوية البهدلة اللي حصلت من الولادة وثقتك في نفسك هنزيد وده هيخليكي تأدي بشكل أفضل.
6-عدم الشعور بالسيطرة: خططي كويس قبل الولادة ورتبي بيتك وفضي الكراكيب من البيت ده هيديكي مساحة إنك تتحركي بسهولة بعد الولادة ويخليكي تنجزي أسرع.. خليكي واقعية في خططك وأهدافك في الفترة دي عشان ما تحبطيش لو ما قدرتيش عليها وكمان خليكي مرنة في تعديلها.. وقدري اي انجاز بتعمليه واحتفلي بيه.. كافئي نفسك بحاجات بسيطة في آخر اليوم على صمودك.
7-عدم التقدير والمساعدة من الناس المحيطين بيكي : معلش هم بيبقوا فاكرين من التلفزيون والفيس بوك إن الأمومة دي حاجة كدة سو كيوت وبس .. أو ساعات بيبقوا مش عارفين انك محتاجة مساعدة من كتر ما انت عاملة فيها سوبروومان..الحل بسيط..اتكلمي..فضفضي..اطلبي المساعدة وخليكي واضحة في طلبك.. " أنا محتاجاك تساعدني في إنك تشيل البيبي لمدة ساعة عشان محتاجة أنام"
8-قلة الحيلة: مش عارفة تعملي إيه وتتصرفي ازاي وترتبي أمورك ازاي خصوصا لو أول بيبي ..بسيطة جدا.. اسألي كل اللي حواليكي عن تجاربهم واللي تشكي فيه راجعي فيه متخصص.... ملحوظة:البيبي أقل من 6 شهور حاجة مابيخشش بقه غير التلاتة دول لبن الرضاعة، دوا المغص، تيتينا لو حبيتي.. فقط!!، حتى لو كل الناس ضغطت عليكي تمسكي بموقفك.. أرجوكي!! وطبعا استعيني بدكتور الأطفال في حتته، دكتورة الرضاعة في حتتها دكتور النسا في تخصصه.. التغذية في مجاله.. وهكذا.
9-عندك مسؤوليات تانية: برضو.. استعيني بالله أولا وبعدها بالناس.. رتبي قبل الولادة.. اهتمي بصحتك ..أكلك.. وحركتك ونفسيتك خصوصا في فترة النفاس..خليكي مرنة وخلي عندك خطط بديلة.
10-الاجتماعيات: زيارات الأهل والمهنئين حاولي ترتبيها بحيث كل مجموعة ييجو مع بعض أهل الزوج مرة..أهلك مرة..أصحابك مرة..يستحسن يبقى فيه حد بيساعدك في استقبال الضيوف .. اشتري عصير في علب وشيكولاته وممكن بسكويت وبتيفور..عشان بيستحملوا يقعدوا كتير من غير ما يبوظو فما تتكلفيش كتير وما توسخيش مواعين كتير مع الضيوف .. خففي حمل التنظيف على قد ما تقدري.. فيه جانب آخر للاجتماعيات: القعاد في البيت بعد الولادة بيتخلله أوقات كتير ميتة بالنسبة لك لما يكون البيبي مش نايم وانت كدة كدة مش بتعملي حاجة.. ده وقت كويس انك تتواصلي فيه مع الناس اللي انت ماكلمتهمش من زمان.
11-الألم والتعب بعد الولادة: نامي كويس قدر المستطاع..راجعي نقطة واحد.. وأرجوكي استعيني بالأطباء المتخصصين في علاج أي مشكلة عندك.. خلي بالك احنا مش كل الأدوية بناخدها مع الرضاعة.
وأخيرا حاسبي على نفسك أوي من اكتئاب ما بعد الولادة.. دي حاجة منتشرة جدا.. تقدري تعرفي معلومات أكتر من بوست سابق بعنوان اكتئاب ما بعد الولادة.
