أدينا عايشين!!

"ليه أنا محتاجة أعالج الاكتئاب أو القلق.. حتى لو درجته بسيطة.. ما أنا عايشة عادي اهو.. كل الناس مكتئبة .. مش هموت من الاكتئاب يعني!!"

طب واحدة واحدة كدة.. هو مفيش حد بيموت من الاكتئاب؟.. فعلا؟! لأ.. لأ.. غير الانتحار.. احنا الحمد لله في مجتماعتنا العربية عندنا حائل ديني بيحمينا شويتين من فكرة الانتحار..(بغض النظر إن الحائل ده بدأ يضعف) لكن ..إن الواحد ينهي حياته بشكل معنوي؟... جسمه عايش بس نَفسه ميته.. كام واحد مكتئب بيتمنى الموت؟! .. كام واحد بيتخيل نفسه ميت بكذا طريقة وبكذا شكل عشان ده آخره ..ما يقدرش يتمادى أكتر من كدة؟!

كل الناس مكتئبة؟!! .. هو ده مبدئيا تعميم.. مش كل الناس مكتئبة (أنا هو مثلا!!).. لأ .. بجد فعلا.. انت عارفة أصلا إن كونك مش قادرة تشوفي الناس السعيدة والناجحة حواليك.. أو مش عارفة تحسي الجوانب المشرقة في الحياة ... ده عرض من أعراض الاكتئاب..

ما انا عايشة عادي أهو.. أنا معاكي.. انت فعلا ممكن تعيشي لحد آخر يوم في عمرك وانت عادي.. بس خليني أقوللك إيه العادي الأول.. العادي أو الطبيعي إن الواحد يحس بالرضا والسعادة والحماس.. خمس أيام من الأسبوع.. والاتنين التانيين ممكن تبقي تعيسة مفيش مشكلة.. ما هو المشاعر السلبية ربنا خلقها فينا لهدف برضوا.. القلق بيحمينا.. الحزن بيزهدنا في الدنيا..الذنب بيخلينا نصلح الخطأ ونتوب.. الغضب بيخلينا ندافع عن حقوقنا.. كل حاجة ربنا خلقها بمقدار.. لو زودنا من المشاعر السلبية دي.. الميزان يختل.. ويعيقك عن الحركة والانجاز..

بمعنى .. تعرفي منين إن الميزان اتخل وان لازم نشوف حل ؟!.. تعرفي من حاجتين:

الأولى: هل انت بتأدي الوظيفة بتاعتك اللي انت تظني إن ربنا خلقك ليها انت لوحدك؟ هل انت راضية عن آدائك ده وللا حاسة إنك عاجزة.. الاكتئاب والقلق معجزينك.. هل انت بتدوري في دايرة.. (أنا نِفسي بس.. مش قادرة )

التانية: انت مرتاحة كدة.. راضية كدة؟

لو إجابتك لأ.. يبقى مستنية إيه؟! هانت عليكي نفسك؟! تفتكري مين أولى بالوقت اللي بيعدي ده؟ مش انت أولى؟! مش انت أولى بنفسك ووقتك من الاكتئاب والقلق والهم؟! طب انت عارفة إنك لو حتى مش حاطة نفسك رقم واحد في أولوياتك.. مش هتعرفي برضو تدي للأولويات بتاعتك الاهتمام الكافي ومش هتحسي بالرضا عن نفسك تجاهها.. لأن ببساطة إنت مش عارفة تدي بكل طاقتك.. عاملة زي المحبوس.. المتلجم!!

أظن إن الوقت جيه ..اللي لازم تعالجي نفسك فيه... اللي لازم تتعلمي فيه ازاي تسيطري على الأفكار السلبية وتتعاملي معاها.. حتى لو كانت درجتها بسيطة! ..الوقت اللي لازم تقفي فيه وقفة مع نفسك.. وتستعيدي فيه راحة بالك... تستعيدي فيه حياتك اللي تستحقيها.. وتشوفي الدنيا بالألوان!!

* لو عايزة تعرفي إيه الحل >> اضعطي هنا