شافوا الدنيا بالألون #5: من حقي أحزن.. من حقي أعيش
فقدت حد عزيز عليها جدا.. من أقرب ما يكون ليها، ورغم إن الموضوع بقاله أكتر من سنة.. بس هي مش عارفة تطلع من الاكتئاب.. فقدت الاستمتاع بأي حاجة وبكل حاجة.. رغم إن الظروف حواليها كويسة جدا.. بس هي مش مستطعمه حلاوة أي حاجة .. وكانت لما تبص لبكرة تحس بالقلق والهم..
كان أهم هدف بالنسبة لي إني أخليها تكسر دايرة الاكتئاب .. هي كانت عندها هوايات بطلت تمارسها لأنها ما بقاش ليها نفس، وحتى لما كانت بتضغط على نفسها وتعملها ما كانتش بتسمتع خالص فتنفر زيادة وتكتئب زيادة.. اتعلمت شوية تقنيات تعلي حماستها شوية motivational techniques ، كانت كل ما تعمل انجاز صغير تتحمس إنها تعمل اللي أكبر منه، وثقتها في نفسها تزيد إنها تقدر تطلع بنفسها من دايرة الاكتئاب..
الموضوع ما كانش سهل سهولة كتابته هنا، على العكس.. مثابرتها والتزامها اللي قليل ما بشوفهم في حد من عميلاتي.. كانوا سبب رئيسي إنها تتحسن.. في خلال شهر ونص رجعت تاني تعمل الحاجات اللي بتحبها وتستمتع بوقتها.. مش بس كدة.. بدأت كمان تهتم بنفسها بعد ما كانت حاطة الجانب ده من حياتها على جنب..
بالمناسبة هي احتفظت بحزنها الشديد على من فقدت.. وتمسكت بالذكريات طول الوقت.. إلا إن الحزن ده رجع لمكانه وحجمه الطبيعي.. ما بقاش يعيقها إنها تعيش حياتها وتستمتع بيها..
