بارانويا الصباح!
أنا مش شخص نهاري.. عرفت ده عن نفسي مؤخرا.. مع إن ده بيفسر حاجات كتير بتحصل من وانا صغيرة أوي.. بصحى من النوم مش عايزة اتكلم مع حد ولا حد يكلمني.. أكتر وقت ببقى فيه مستعدة للخناق هو ده.. أول ما باصحى النوع الوحيد من الاتصال الآدمي المقبول بالنسبة لي هو (wave and say hello) !!.. ممكن بعض العناق الصامت .. ساعات.. بعض الأحيان!!
من الحاجات بقى اللي بتميز المشكلة دي.. إني بصحى عندي أفكار اضطهادية.. آه والله!!.. فجأة كدة..مش شرط خالص يكون حصل حاجة الليلة اللي قبلها ليها علاقة بالشخص اللي انا حاسة دلوقتي إنه بيضطهدني!.. " هي ازاي تنطنشني كدة، وليه دايما أنا اللي باجي على نفسي عشان نعرف نتقابل.. هي أصلا بتمثل عليا إن احنا صحاب.. هي غيرانة مني أساسا.. دي كل مواقفها معايا زفت من ساعة ما عرفتها...) واقعد افتكر بقى كل ال conflicts اللي كانت بيني وبين الشخص ده لحد ما يبقى فاضل أكلمه اتخانق معاه.. واقطع علاقتي بيه للأبد!!
حقيقي أنا ما اعرفش تفسير ده إيه.. بس ناس كتير بتشاركني الموضوع ده.. بارانويا الصباح.. المهم إني اكتشفت علاج ظريف جدا للحد من ضحايا هذه المشكلة.. طريقة من طرق CBT اللي اتعلمتها من دكتور David Burns هي ال counting technique ..تقنية العد.. بسيطة جدا.. لما تحس إنك مش عارف تسيطر على أفكار أو مشاعر سلبية معينة.. أو مش قادر تاخد وتدي معاها وتواجهها.. اعمل لها وقت مستقطع.. بمعنى إيه؟! .. يعني مثلا في حالتي دي.. أنا قررت إني أسيب نفسي للأفكار الاضهادية دي لمدة ربع ساعة.. وببص على الساعة .. أول ما الربع ساعة دي تخلص بافكر في حاجة تانية أو أشغل نفسي بحاجة تانية.. على شرط.. إن في خلال الفترة دي أنا ممكن أفكر في أي حاجة واتخيل أي حاجة ( أنا ممكن أشتم واتخانق واقول كل اللي في نفسي.. جوايا بس.. واتنرفز واحس بكل الغضب اللي ممكن أحسه) بس مش مسموح إني اعمل human contact في الوقت ده.. أو اتصال بشري.. لا مع الشخص اللي بيضطهدني ولا مع حد تاني.. لأن هيحصل ما لا يحمد عقباه في الحالة دي!!
ملحوظة: بمجرد ما الواحد يفوق من الموضوع ده بيرجع لعقله وبياخد قرارات عقلانية أكتر.. اديها وقتها بس.. وممكن توضح للناس اللي حواليك إنهم يتجنبوك في الوقت ده!
طيب.. تقنية العد دي من أقوى الطرق في علاج الأفكار والمشاعر السلبية المستعصية..انت بتديها وقتها بس بشروطك.. ممكن نستخدمها مثلا مع الحزن.. الغضب.. ال grief (احساس الفقد).. لو فقدت حد أو حاجة بتحبها.. وحاسس إنك غرقان في مشاعر الحزن والفقد والأسى.. ده حل مثالي.. وقت مستقطع كل يوم تعيش فيه الإحساس ده براحتك على الآخر.. وبمجرد ما الوقت يخلص.. تقوم تشوف حاجة تانية تعملها.. بس كدة!!
جربوها وقولولي استخدمتوها في إيه.. وكانت إيه النتيجة؟!
