7 أسرار لم تخطر في بالك للرضاعة الطبيعية تحميك من الاكتئاب

Dr. Hoda Serag
Jan 21, 2017
2 min read

وانت بتستعدي للولادة ناس كتير بتقوللك عن اللي المفروض تعمليه بيحضروك لكل حاجة تقريبا ما عدا حاجتين ..نفسيتك ممكن تتأثر ازاي، والرضاعة ممكن تبقى عاملة ازاي!! كنا قلنا قبل كدة إن فيه حاجة اسمها احباط واكنئاب ما بعد الولادة ..ازاي تتجنبي الاكتئاب ده هتلاقيه في بوست "اكتئاب ما بعد الولادة" ولكن فيه عامل مهم اوي حبيت أفرد له بوست لوحده وهو الرضاعة الطبيعية وعلاقتها بمنع اكتئاب ما بعد الولادة.

تعرفي إن فيه أبحاث كتير بتتكلم عن أهمية الرضاعة الطبيعية في حمايتك من اضطراب المزاج والاكتئاب اللي بعد الولادة!! لدرجة إنهم بيقولوا إن اللي ما بتعرفش ترضع طبيعي ممكن يوصل حزنها لدرجة إنها تبقى حزينة زي اللي ابنها مات أول ماتولد!! تخيلوا عمق الحزن ده! رينا يكفينا شر ده وشر ده..

عايزاني أقنعك أكتر.. آدي يا ستي 7 طرق مختلفة بتخلي الرضاعة الطبيعية تساعد على منع الاكتئاب:

1-الإحساس بالقوة والانجاز: ودي أحلى حاجة في الموضوع..إحساسك وانت بتتحدي كل الصعوبات والتعب واللي غيرك ما اسحملتهوش في سبيل إنك ترضعي ابنك طبيعي..ويعدي الوقت والبيبي يكبر ووزنه يزيد.. وتحسي بفخر وانت شايلاه كدة وهو بقى كلبظ.. وتقولي بمنتهى العزة: "كل ده من دمي".

2-القرب البدني: وجود البيبي في حضنك لأوقات كتيرة زي ما بيهدّيه ويطمنه بيهدّيكي انت كمان وبيطمنك والقرب النفسي والعاطفي: لأنك مش ما بتبقيش عارفة بالظبط الطفل رضع كام مللي "زي في حالة الصناعي" فبتعتمدي أكتر على فهمك لأبنك وحركاته.. يعني بتفهميه أسرع وده بيخلي الترابط بينكم أقوى..ويخلي احساسه بالأمان أكتر وبالتالي نموه العاطفي يبقى أحسن.. بيبي مستقر عاطفيا يساوي ضغط نفسي أقل عليكي.

3- الرضاعة بتخلي هرمون اسمه "الأُكسيتوسن" يطلع في الدم وده بياساعد على انقباض الرحم ورجوعه لحالته الطبيعية في أسرع وقت ممكن.. شفاء أسرع.. يعني صحة أسرع.. يعني قدرة على الحركة والانجاز أسرع.. فيمنع احساسك بالتعب وعدم الانجاز وبالتالي يمنع الاكتئاب.

4-بيستهلك سعرات حرارية: الرضاعة لوحدها بتستهلك من 400 ل 500 كالوري في اليوم ..بذمتك دي لوحدها ما تشجعكيش على الرضاعة!!.. يعني ممكن ترجعي لوزنك الطبيعي وممكن تخسي كمان لو بتاكلي صح..وده بيساوي رضا عن شكلك أكتر وبشكل أسرع وبالتالي تمنع الإحباط والضيق.

5-أرخص: الرضاعة الطبيعية مش بتكلف البيت ماديا.. وبكدة شيلتي من على نفسك وجوزك أو أهلك حمل نفسي جاي من تكلفة اللبن الصناعي العالية...وكفاية عليكم تكلفة البامبرز.

6-أنظف: وده معناه بيبي صحته أحسن بيمرض أقل فما يضغطش عليكي كتير بدنيا أو ماديا أو نفسيا.

7-أسهل: في الرضاعة الطبيعية انت مش محتاجة كل شوية تقومي تجهزي رضعة ..مش محتاجة وانت في عز نومك تقومي تجهزيها ولا وانت خارجة .. وتقعدي بقى تظبطي درجة حرارة الماية وابنك بيبتزك بصوت عياطه.. وتغسلي في بيبرونات ويا يشربها يا ما يشربهاش... في الرضاعة الطبيعية الموضوع أسهل بكتير..وده بيشيل عليكي هم من الهموم اللي وراكي بعد الولادة فبرضو يمنع حدوث التعب والإرهاق الشديد اللي ممكن يخليكي تكتئبي.

طبعا اللي فات ده كله حاجة بسيطة أوي من الفوايد العظيمة للرضاعة للأم والبيبي.. الموضوع ده ممكن نكتب فيه مجلدات.. الحمد لله على النعمة العظيمة دي والإعجاز اللي فيها..

أنا بس حبيت أناقش الجانب النفسي من الموضوع ده وأتمنى إن صوتي يوصل لأمهات كتير عشان نضمن لأطفال وأمهات كتير الصحة والمعافاة النفسية والبدنية.

ودمتم أصحاء ومعافين