شافوا الدنيا بالألوان #1 أنا باغلط .. بس مش أنا الغلطة

Oct 31, 2016

1 min read

جاتلي بتشتكي إنها عندها عادة سلبية مش عارفة تتخلص منها بقالها سنين مش عارفة تبطلها.. نظرتها لنفسها سيئة جدا.. دايما شايفة نفسها قليلة.. بتلف في دايرة الاكتئاب بقالها سنين.. راحت لدكاترة نفسيين وادولها تشخيص وأدوية تنتظم عليها .. تتحسن شوية وترجع تنتكس.. وساعات تبقى ماشية على الدوا وبرضو حالتها النفسية والعادة السلبية دي في منتهى الشدة..

كان تركيزي معاها إني أعلمها تقنيات تعلي ثقتها بنفسها.. واعلمها ازاي تنجز وتستطعم الإنجاز.. تحب نفسها حب من غير شروط.. تحب نفسها سواء أنجزت أو ما أنجزتش.. أخطأت أو ما أخطأتش.. وفي وقت قليل جدا.. مزاجها اتحسن وثقتها في نفسها عليت.. وواحدة واحدة العادة السلبية كمان قلت جدا..

اشتغلنا على حاجة بسيطة جدا في العادة السلبية .. تقنية ال positive distortions وتقنية devil’s advocate عشان نفهم ونستوعب ازاي المخ بتاعنا بيشتغل عشان يحلي لنا حاجات أو تصرفات إحنا مش عايزين (حابين) نعملها بعقلنا الواعي.. بس عقلنا اللا واعي بيوقعنا فيها كل شوية.. (مثال لده: أكل الأكل غير الصحي.. التدخين ..الغضب..)

كنت شايفة إن الشغل على الاكتئاب وتقوية الثقة بالنفس.. وفك الرابطة بين المزاج السئ والعادة السيئة.. هو الخط الرئيسي للعلاج.. والخط الفرعي هو الشغل على العادة نفسها.. والحمد لله طلع تقديري صح.. وده اتأكدنا منه أنا وهي بال scores بتاعة الاختبارات المستمرة.

ملحوظة: احنا عملنا الإنجاز ده واحنا بنسحب الأدوية.. هي حققت ده بدون أدوية.. والتأثير مستمر.. لحد دلوقتي!!