14 قاعدة تعرف بيهم المعالج النفسي الشاطر!

في البداية لازم نعرف مين هم الأشخاص اللي ينفع يعملوا علاج نفسي (psychotherapy) :

أولا الطبيب النفسي.. ثانيا الأخصائي النفسي حسب تخصصه psychologist, clinical psychologist, social psychologist and psychotherapist .. ثالثا: الاخصائي الاجتماعي في بعض الأحيان مع مراعاة إنه يكون واخد شهادة بممارسة العلاج النفسي وخبرة في ده...

..وطبعا ما ينفعش حد غير الطبيب هو اللي يوصف دوا..ولما بيعمل ده.. بيوضحلك اختياره للدوا تم بناءا على إيه..وبيفهمك عامة الدوا ده بيشتغل ازاي..وهتاخده فترة أد إيه و بيتابع آثاره وآثاره الجانبية معاك..

ودي بقى الحاجات اللي لو لاقيتها في المعالج بتاعك كمل معاه على طول..

1- بتحس انك مرتاح معاه، مش حاسس ناحيته بالقلق أوالخجل.

2- مش بيحكم عليك ولا على تصرفاتك ولا بيصنفك.

3- بيسمعك كويس ودايما بيسألك " أنا فهمت كذا.. أنا فاهمك صح؟!"

4- بيحترم خصوصيتك ومش بيناقش مشاكلك مع حد تاني إلا بعلمك.

5- بيشتغل معاك على أجندتك انت.. مش على الحاجات اللي هو شايف إن فيها مشكلة.. ولو شايف أهداف مختلفة بيوضحهالك ويوضح أهمية الشغل عليها.. ويستناك تحطها في أجندتك.

6- بتحس إنه حاسس بيك أو على الأقل مقدر حالتك ومتفهم ظروفك.

7- بيخليك دايما تقيم آداؤه وبيتقبل نقدك ليه وبيحسن شغله معاك بناءا على ده.

8- بيعمل اختبارات مكتوبة كل شوية للأعراض اللي انت جاي تشتكي بيها.. عشان يعرف انت بتتحسن وللا لأ.. مش بس بيسألك نظري.

9- الجلسة معاه ليها system مش هلامية.

10- بيوضحلك خطوط عريضة للجلسات والحاجات اللي هتعملوها عموما.

11- الجلسة ما بيتقلش عن 40 دقيقة وعلى الأقل مرة في الأسبوع..

12- عنده طرق كتير وtechniques متنوعة لحل مشكلتك..

13- عنده من الشجاعة والأمانة اللي يخليه يقوللك أنا stuck لو حصل ده.

14- لما بتخف وبتتحسن.. بتتحسن في الجلسة وبرة الجلسة كمان.. لأنه بيعلمك ازاي تعمل ده لوحدك وانت بعيد عنه.