الدواير المفرغة في الاكتئاب
لما بيكون الواحد مكتئب بيبقى مش متحمس يعمل حاجة ومش قادر يلاقي المتعة في الحاجات اللي بيعملها.. الحاجتين دول مع الإحساس بالتعب والإجهاد معظم الوقت وضعف التركيز في بعض الأحيان.. يخلوا الواحد مالوش نفس يعمل أي حاجة..وبالتالي تلاقي الست مثلا لو استسلمت للأحاسيس دي، تلاقيها بدأت تسيب مثلا الحاجات اللي وراها في البيت.. بدأت لو عندها عيال ما تركزش معاهم أو تتعامل بعصبية وغضب لأنها مش قادرة تبذل مجهود في التعامل معاهم.. هي لو عليها عايزة تتجنبهم أصلا، لو بتشتغل تغيب كتير وشغلها يبقى يا دوب الكفاف.. في علاقتها مع اللي حواليها تبدأ تنسحب وما تبقاش طايقة تكلم حد ولا حد يكلمها ولما حد بيحاول يقتحم عالمها تتعامل بعصبية ونفور .. طب تبقى إيه النتيجة؟!
تظهر بقى بقية أعراض الاكتئاب.. حاسة إني ماليش لازمة ولا قيمة، حاسة إن مفيش فايدة، وحزني يزيد ..زعلانة على نفسي إني ما بنجزش ولا بحقق حاجة ومش ناجحة حتى في أبسط الحاجات .. بيتي مكركب وحاجات متراكمة أد كدة وعلاقتي مع اللي حواليا زفت ومش بعمل أي حاجة مفيدة.. وعندي وقت بس لا قادرة أعمل حاجة لنفسي ولا لغيري!!
اللي فات ده اسمه دايرة مفرغة من الاكتئاب.. ما ليش نفس اعمل حاجة فما بعملش حاجة فبحس بالاكتئاب فبيزيد احساسي ان ماليش نفس!!
طب والحل؟!
بسيطة.. اكسري الدايرة!! حطي لنفسك أهداف صغيرة جدا وتكون متنوعة واعمليها حتى لو بتعمليها ودموعك على خدك.. واحدة واحدة احساسك بالانجاز هيزيد والدوبامين يعلى في المخ والاكتئاب يفك شوية صغننة ولما مزاجك يتحسن يزيد انجازك.. وهكذ..وتبقي غملتي دايرة مفرغة جديدة من الرضا والانجاز
الموضوع محتاج شوية مجهود بس النتيجة أكيدة وفوريه...
Make a plan, stick to the plan beat depression
