اكتئاب ما بعد الولادة
اتكلمنا المرة اللي فاتت عن حالة طبيعية بتعدي بيها معظم الأمهات في خلال أول أسبوعين بعد الولادة، واللي بشوية مساعدة من الأهل أو الناس المحيطة بالأم بتتحسن وبتختفي تماما.
المرة دي بقى الحالة أصعب والمشكلة أكبر، غالبا بنحتاج نستشير طبيب نفسي فيها وقد نحتاج لأدوية تساعدنا نعدي الأزمة. بس المشكلة الحقيقية هي إن معظم الناس ما يعرفش عن المرض ده حاجة وبالتالي تتفاقم المشكلة وتكبر في حين إن علاجها سهل إن شاء الله. ولكن أهم حاجة إن احنا يبقى عندنا الوعي بيها عشان نتصرف بدري وصح.
فوزية المرة دي مش بس عندها شوية قلق ومزاجها متقلب لأ دي متضايقة وزعلانة طول الوقت تقريبا، ما تحسش إن الست دي فيه حاجة مفرّحاها أصلا، ولا حتى البيبي الجديد! مش مهتمة بنفسها ولا بالبيبي ولا مهتمة تقابل الناس ولا الضيوف ( ولو حتى جايين ينقطوا الواد!) مشاعرها كلها سلبية حزن شديد، احساس بالذنب وقلة الحيلة ناحية البيبي، مش حاسة بأي أمل أو تفاؤل باللي جاي.
ممكن كمان يبقى عندها أفكار إنها خايفة تأذي البيبي وده يخليها تبعد عنه وعن احتياجاته أكتر وأكتر. مش عايزة تاكل وبتخس أو بتاكل كتير جدا على غير طبيعيتها، ما بتنامش أو بتنام كتير جدا. لو حاولت تطلعها من اللي هي فيه مثلا فتقوللها تعالي نتفرج على "حريم السلطان" اللي انت بتموتي فيه، ولا الهوا!! أي حاجة كانت بتبسطها زمان لا تعنيلها أي شئ دلوقتي! طب نخرج طب نرغي .. ولا أي حاجة!!
ولو الموضوع تفاقم أكتر الأم دي بتبتدي تفكر كتير في الموت وفي بعض الأحيان في الانتحار!
طب تفتكروا ليه المشكلة دي كبيرة ولازم علاجها فورا؟! غير يعني موضوع الموت والانتحار؟! أولا الأم دي ممكن تكمل بقية حياتها كمريضة اكتئاب.. الموضوع يبتدي مع الولادة ويمكن يظهر في خلال الحمل ويكمل بالسنين!! وطبعا مريض الاكتئاب ما بيعرفش يدّي.. بمعنى.. هي لا عارفة تعتني بنفسها ولا بالبيبي ولا بالزوج ولا البيت وبقية الولاد وحتى لو بتشتغل الشغل برضو هيتأثر. فكل حاجة وفرد حواليها بقى عنده مشكلة، البيبي زن على طول على الفاضي والمليان وممكن لو كبر في الجو ده تلاقي بقى مشاكل نفسية وتربوية وفرط الحركة وقلة الانتباه قد يصيبوا الطفل ده. وحتى الأب سهل يتعدي لأن بالتبعية مسؤوليات الأم دي هو اللي هيشيل همها فبالتالي الزوج نفسه ممكن يصاب بحالة شبيهة باكتئاب ما بعد االولادة!! وبدل ما كانت ولادة الطفل الجديد ده فرحة وبداية جديدة اتحولت لمشكلة ممكن يتهدّ بيها هذا البيت... لا قدّر الله!!
طب إيه الحل؟!
قبل ما نعرف إيه علاج اكتئاب ما بعد الولادة خلونا نعرف إيه العوامل اللي خلت فوزية عرضة لهذا المرض. طبعا زيها زي أي أم، تغيير الهرمونات والضغط النفسي مع الوجع وتعب الجسم بيكوّنوا مع بعض عود الكبريت اللي ولع المشكلة دي، ولكن ده مش مع أي أم، لازم يكون أصلا هي عندها استعداد للمرض، ودي بعض الحاجات اللي تخليني أركز قوي مع الأم دي وابقى خايف عليها من اكتئاب ما بعد الولادة:
إنها أصلا مريضة اكتئاب!
إنها في العادي بيبقى مودها ومزاجها مضطرب جدا قبل وساعة الدورة الشهرية .... بتتحول في الأيام دي! والناس اللي حواليها كلهم بيعروفوا إنها في الدورة الشهرية ساعتها. حاجة اسمها PMS بس شديدة شوية.
لو الست دي حصلتلها هي أو للبيبي مشاكل صحية جامدة أثناء الحمل أوالولادة.
لو عندها مشاكل مع زوجها ... خناقات، طلاق، وفاة....
لو ما عندهاش حد يساعدها وياخد بإيديها من العيلة أو الصحاب أو الجيران... وحدي وحيدا متوحدا..
لو لا قدر الله حسيتي إن عندك الأعراض دي أو تعرفوا حد بيعاني من المرض ده فبعد استشارة طبيب نفسي طبعا.....اللي جاي ده هو قلب العلاج وأهم حاجة فيه:
1-تكوين حاجة اسمها (support system).... بمعنى نظام دعم ومساعدة.. يتكون من:
أي حد قريب منك في البيت يساعدك في البيبي وشغل البيت ( زوج- أم- أخت- صديقة- جارة- خادمة..) أي حد أو كل الناس دي بالتناوب المهم يبقى فيه إيد معاكي بتساعد.. عشان طول ما حاجات البيبي والبيت متلغبطة وفيها مشكلة كل ما الاكتئاب وقلة الحيلة والاحساس بالذنب هيزيدوا.
عايزين ودان .. أيوة ودان!!.. برضو ودان (زوج- أم- أخت- صديقة- جارة..) حد وظيفته يسمع ويطبطب ويقول الله يعينك وبس! وممكن تعمليها بالتناوب برضو عشان تستفيدي منهم للآخر.
تواصلي مع ناس يفيدوكي في ازاي تعدي الأزمة دي.. أمهات شاطرة مثلا يقولولك طرق تتعاملي بيها مع العيل والبيت والزوج في الفترة دي وازاي تعملي الحاجات دي بسهولة.. معالجة نفسية تعلمك ازاي تتعاملي مع المشاعر السلبية.. أمهات عندهم نفس المشكلة وتتبادلوا الخبرات والآراء حتى لو عن طريق النت.
2-نامي كويس! .. آه والله .. النوم لفترة معقولة .. سبع ساعات مثلا بيساعد إن المواد الكيميائية اللي في المخ تتزن وبالتالي يخف الاكتئاب أسرع.. ماتقولليش أنام ازاي .. عارفة إنه صعب .. بس فين رقم واحد؟! ال support system؟!
3-اتعرضي للشمس حتى لو 10 دقايق في اليوم.. ضوء الشمس بيشتغل بكذا طريقة فإنه يحسن الاكتئاب.
4-العبي رياضة.. أيون! طالما دكتور النساء سمحلك بالرياضة (وده عادة بيبقى بعد أسبوعين تلاتة من الولادة).. في البيت بقى.. في الجيم.. في الشارع انت حرة.. والأفضل على الإطلاق إنك أول ما تحسي إنك تعافيتي من الولادة اتمشي كل يوم 20 دقيقة على الأقل. (على مشاية أو في الشارع.. الأنسب لك)
5-خصصي وقت لنفسك..ليكي انت لوحدك تعملي فيه حاجة بتحبيها.. تاخدي دش دافي.. تشربي نسكافيه في صمت ..تقري حاجة ..تسمعي حاجة .. اللي انت تحبيه بس يبقى وقت ليكي لوحدك حتى لو 10 دقايق في اليوم!!
البني آدم الطبيعي بيبقى متزن لما يكون عنده أربع حاجات مظبوطة في حياته (الجسد- الروح- العقل- العلاقات الاجتماعية) بمعنى ممارسة الرياضة والحركة بشكل عام + روحانيات (صلاة، قرآن، دعاء، ذكر، يوجا وتأمل) + نشاط ذهني (بتقري كتاب، بتشوفي بنامج، بتسمعي درس..) + علاقات أسرية وصداقات وخروجات ومناسبات.
5-سجلي أو اكتبي مشاعرك.. اللي بسطك واللي ضايقك.. ده هيساعدك إنك تتعرفي على نفسك أكتر وتتعاملي معاها أحسن.
6-سجلي انجازاتك واتكلمي فيها مع اللي بيحبك وافرحي بيها حتى لو لوحدك (الأمومة أصلا مش سهلة ما بالك لما يكون انت عندك مشكلة ومع ذلك بتعرفي تعملي إنجازات)
****** نصيحة قلبية ليكي ولأي أم... يمكن تستكتري اللي فات ده على نفسك.. أو تقولي هو ده اللي هيجيب نتيجة؟! .. أو تتكسفي إنك تطلبي مساعدة من حد.. أحب أقوللك هو انت مش إنسانة ليكي الحق إنك تحسي بنفسك وتبسطيها وتريحيها شوية! طب لو انت شايفة إن (إنت) مش من أولوياتك وان أهم حاجة البيت والأطفال والزوج.. طب ماهو انت مش هتعرفي تدّي لحد حاجة لو انت نفسك مش كويسة.. هتطلعي بيبي أو بني آدم مبسوط ومتزن ازاي وانت مش قادرة أصلا تضحكي في وشه؟! هتقدري تظبتي بيتك ازاي وانت مش قادرة حتى تظبتي حالك ومش قادرة أو مالكيش نفس تتحركي!! هتدّي جوزك ازاي وانت أصلا عايزة اللي يديكي.. وما تستتقليش تطلبي مساعدة.. اللي هيشيلوا معاكي دلوقتي هيرتاحوا قريب أوي لما انت تبقي كويسة! وحطي في بالك ان ممكن يكون الناس اللي حواليكي ما بيساعدوش عشان ما يعرفوش أصلا انك محتاجة مساعدة، ما انت عاملة فيها سوبرمان!!
يمكن يجي في بالك سؤال: هم اللي حواليا هيسيبوني أصلا آخد بالي من نفسي وأخصص وقت ليا لوحدي؟!! أحب أقوللك انت وشطارتك اللي حواليكي هيحترم رغباتك واحتياجاتك لو انت نفسك احترمتيها والتزمتي بيها... حتى البيبي هيفهم والله.. وعن تجربة!
آخر حاجة بقى.. أمال الدكتور النفسي هيعمل إيه؟!!
حاجتين فقط:
1-يشخص الحالة قدام الزوج والأم والحماة والأهل والأحباب ويقوللك الكلمتين اللي فاتو دول قدامهم.. فالكل يتخض بقى ويضطر ينصاع لكلام الطبيب وإلا الحالة هتتفاقم .. وده أهم دور للدكتور الحقيقة!
2-يوصف دوا أو أي علاج تاني.. وده في الحالات الشديدة جدا وبرضو بيبقى مع الحاجات اللي فاتت.. ما فيش دوا نفسي بيشتغل لوحده! (وفي الحالة دي بنتابع أخد الدوا مع الدكتور كويس قوي)
وأخيرا اكتئاب ما بعد الولادة مرض نفسي يؤثر على الأم والطفل وكل أفراد الأسرة ولكن يسهل علاجة إذا ما تم اكتشافه باكراوتدخّلنا التدخل السليم لمعالجته واحتوائه.
**** اكتئاب ما بعد الولادة قد يظهر بعد فترة طويلة من الوضع قد تمتد لستة أشهر!!!
ودمتم أصحاء وسعداء،،
