احباط ما بعد الولادة
postpartum blues(baby blues)
الناس دايما بتتوقع إن بعد ما البيبي بيشرف الأب والأم بيبقوا في قمة السعادة والهنا والسرور.. وده حقيقي .. ولكن الحقيقي كمان إن غالبية الستات بعد ما بيولدوا بتجيلهم حالة كدة اسمها احباط ما بعد الولادة .. يعني تبقى فرحانة آه بالعيل ولكن تلاقي مزاجها مش مظبوط شوية هادية ومبسوطة وشوية زعلانة وقلقانة ويا عيني تلاقي كل شوية عنيها تدمع واقل كلمة ممكن تأثر في نفسيتها فتخليها تتعصب أو تعيط أو تضحك.. مزاجها متقلب جدا .. عندها أسئلة كتير ومخاوف أكتر.. أنا إيه اللي عملته في نفسي ده؟! كان مستخبيلك فين يا فوزية؟! أنا مش هقدر آخد بالي من الكائن ده؟! أنيّمه ازاي هو ليه ما بينامش ؟! أأكله إيه؟! هعرف أربيه وللا هيطلع قليل الرباية؟! هدخله مدرسة إيه ؟! هصرف عليه منين؟! وطبعا مع الإرهاق الجسدي اللي الأم بتكون فيه لازم الأعراض دي يكون معاها قلة نوم وأرق و زود عليها ألم فعلي مكان الجرح سواء والدة طبيعي أو قيصري.
عادة معظم الأمهات بتتعرض للحالة دي في خلال أيام من بعد الولادة وده بيبقى غالبا ناتج من الضغط النفسي والبدني اللي بتتعرضله الأم وقت الولادة ونزيد عليها تغيير رهيب في الهرمونات في جسمها، من الطبيعي إن الأعراض دي تفضل موجودة لأسبوعين ولكن ده بالكتير جدًا. بعدها بتبدأ الأم تدريجيا تتفهم الموقف اللي بقت فيه وواحدة واحدة بتلاقي طريقة تتعامل بيها مع حياتها الجديدة، خصوصا إن الألم بدأ يخف والهرمونات بدأت تستقر.
الحالة دي لا تستدعي أي تدخل طبي الحمد لله، ولكن مطلوب تدخل أسري رفيع المستوى، بمعنى إيه؟! نريح الأم شوية نشيل عنها شوية، نساعدها بالقدر اللي تحتاجه في تلبية احتياجاتها واحتياجات البيبي واحتياجات بيتها. مطلوب كلمتين حلوين ويا حبذا من الزوج ويا سلام لو طبطبة وبوسة على الراس وهيبقى رائع لو الزوج بالذات أبدى اهتمام بالزوجة وفرحة بقومتها بالسلامة وتقدير لتعبها اللي عدت بيه عشان ييجي المحروس، ويبقى مثالي.. آه والله .. لو ساعد بقدر الإمكان في البيبي وللا في البيت. تقوم لما الست تحس باهتمام وتقدير من اللي حواليها وإنها مش لوحدها هتتعافى أسرع ويرجع لها اتزانها النفسي في خلال أيام قليلة، والكل يبقى مبسوط!
بلاش بقى الكلمتين الظراف اللي تقريبا مفيش ست والدة خصوصا لو أول ولادة إلا بيتقالولها: "ما تشدي حيلك بقى بلاش دلع" "ده انا لما ولدت لا كان معايا لا بابا ولا ماما ولاأي حد في الدنيا وقعدت أولد أسبوع وبعدها بربع ساعة قمت سيقت البيت وجهزت الطبيخ واستقبلت الضيوف اللي جايين ينقطوا الواد!" يعني الكلام ده واضح إنه مؤذي جدًا لأن أولا معناه إن الست دي بتستعبط وماحدش مقدر اللي هي فيه وبينها وبين نفسها هتحس إنها عاجزة وإنها أكيد عندها مشكلة كبيرة لأن غيرها عملت سوبرمان بعد ماولدت!!
#الكلمة-الطيبة-صدقة
