مين طفا النور!؟
هو الاكتئاب ده جيه منين.. إيه السبب؟
عشان أوضح لكم الإجابة.. شوفوا معايا القصة دي..
" بنتين مع بعض في الفصل وهم الاتنين مستواهم كويس أوي في الدراسة... لما طلعت نتيجة الامتحانات.. هما الاتنين جابوا 99% وده كان رد فعلهم:
الأولانية: انهارت من العياط .. وكانت حاسة بالإحباط.. وفقدت ثقتها بنفسها.. ودخلت في اكتئاب!
الثانية: طارت واتنططت ممن الفرحة وعملت احتفالات 40 يوم بلياليهم!
طب إيه الفرق بين دي ودي.. ليه الأولانية جالها اكتئاب مع إن ظاهريا النتيجة دي تعتبر إنجاز؟!
أولاً: طريقة التفكير.. كل واحدة شايفة اللي حصل ده ازاي..
الأولانية .. شايفة إن مثلا: "إيه الجديد؟ طب مانا على طول بجيب الدرجة دي.. كان المفروض أقفل.. فيه ناس تانية بتجيب زيي، يبقى أنا غبية.. أنا مش شاطرة.. أنا هفضل طول عمري فاشلة!!"
التانية بقى: "الحمد لله.. أخيرا.. أنا كنت عارفة إني أقدر.. أنا فخورة جدا بنفسي.. هكلم ماما افرحها.. ده انا هتسلى على أهلي بسبب الإنجاز ده!"
ثانيا: ال inputs الإدخالات اللي عند كل واحدة.. طريقة تربيتها.. ظروفها.. التجارب اللي عدت بيها.. الضغوطات اللي عليها
ثالثا: الجينات.. كل واحدة وارثة إيه في جيناتها.. الطبيعة البشرية المختلفة عند كل واحد.. اللي هو مالوش دخل فيها.. عادي ممكن اتنين اخوات عايشين في نفس البيئة والظروف وبيتلقوا نفس التربية .. ولكن لكل واحد شخصيته وميوله المختلفة..
بس الفكرة بقى إن مفيش ما يثبت علميا إن فيه جين معين هو سبب الاكتئاب! يعني اعتماد الواحد على فكرة إني أنا كدة ربنا خلقني كدة.. في الحتة دي بالذات مش سليمة!!
بدليل إن ربنا سبحانه وتعالى قال في كتابه: " ولا تهنوا ولا تحزنوا" .. ازاي ربنا ينهانا عن حاجة إحنا ما نقدرش نبطلها.. وهو السبب فيها.. إنه خلقنا كدة!!
يبقى كدة أضحنا الحجة بتاعت.. الاكتئاب ده جينات.. مش هعرف أغيره غير بالأدوية!
آه الاستعداد مختلف ودرجة الشدة والصعوبة مختلفة من حد للتاني عشان السبب التاني والتالت.. بس الواحد ممكن يقاوم الاكتئاب بشوية مجهود!
والحجة التانية بتاعت الإدخالات.. هرد عليها بسؤال.. عمرك شفت حد عنده ابتلاءات شديدة وطول عمره عنده مشاكل.. ومع ذلك سعيد وراضي ومطمئن وناجح في حياته؟!
هيتبقى بس الأفكار..هي اللي ليها الإيد العليا في التحكم في مزاجك.. ازاي بتشوف الأمور.. ازاي بتبصلها.. وتعمل لها processing .. هو ده مربط الفرس.. احنا بنحس بناءا على أفكارنا..
!We feel the way we think
**لو عايزة تعرفي الاكتئاب ممكن يأثر ازاي على حياتك .. اقرئي المقالة دي >> إيه اللي بيحصل لما الواحد يكون مكتئب؟!
