شافوا الدنيا بالألون #7: بنلف في دواير!!

انك تعيش حياتك في قلق .. أو دواير متداخلة من القلق والمخاوف. التفكير الكتير.. المثالية..جلد الذات.. قلة الثقة في النفس.. الاكتئاب.. دواير كتير.. متداخلة ومفرغة.. حاجة بتجيب حاجة .. ايه ممكن يكون أكثر ارهاقا من كل المشاعر السلبية دي لما تكون محاوطاك من كل ناحية؟!!

دي كانت حالتها لما جاتلي.. وكانت ماشية على دوا في سبيل إن قلقها يقل.. ولكن ما حصلش..

اتعلمت ازاي تعرف مصدر مشاعرها.. ازاي أفكارها هي اللي بتولد كل المشاعر السلبية دي.. وعملت تحدي للأفكار دي.. واكتشفت أد إيه مليانة عيوب إدراك.. واتعلمت ازاي تحولها لأفكار إيجابية.. حقيقية وقوية كفاية إنها تحل محل الفكرة السلبية المشوهة.

علمتها ازاي ما تبنيش ثقتها بنفسها على إنجازها أو على تقبل الآخرين ليها.. واستخدمنا تقنيات بسيطة تقاوم بيها جلدها لذاتها .. وتتقبل نفسها و اللي حواليها .. وأدركت أد إيه المثالية بتعجزها.. وتوترها وتحمّل عليها.. وانها بتضرها أكتر ما بتنفعها..

الرحلة معاها ما كانتش مجرد علاج نفسي كانت رحلة اكتشاف للذات وبداية جديدة.. هي دلوقتي مش بس اتغيرت واتحسنت.. لأ هي بتعلم اللي حواليها كمان كل اللي اتعلمته وفهمته.