شافوا الدنيا بالألون #6: أنا عارفة .. بس مش عارفة!!
من أصعب الحالات اللي بتعامل معاها هي اللي بتكون أصلا عندها فكرة عن مبادئ العلاج النفسي، قارية كتير.. حاضرة كورسات في التنمية البشرية .. في التربية.. في العلاقات.. ببساطة هي عندها معلومات كتير أصلا .. وفيه حاجات كتير من اللي هقولهالها هي أساسا عارفاها.. طب المشكلة فين بقى؟!.. التنفيذ!!..
عشان تقتنع إنها تجرب التقنية الفلانية وتنفذها وتشوف النتيجة بنفسها، ده كان يستلزم وقت ومجهود كبير أوي.. حاجة مشهورة أوي في العلاج النفسي اسمها المقاومة resistance .. بس كتير مش بيعرف يتخطاها..يعني مثلا أنا (كعميلة) عايزة اتحسن واخف من الاكتئاب ويبقى عندي ثقة في نفسي واظبط علاقتي بجوزي و.. و.. بس مش عارفة أنفذ الكلام اللي بيقولهولي المعالج .. ليه بقى؟!
هنا كان شغلي معاها في الأول.. ازاي تفهم نفسها..هي بتقاوم العلاج النفسي ليه؟! ليه مش بتعمل الواجبات اللي بتتطلب منها اللي المفروض لو عملتها هتتحسن؟! لما طلعنا أسباب المقاومة دي على الترابيزة.. حددناهم وكتبناهم.. ده خلاها تشوفهم بعينيها ..تفهم نفسها أكتر وتواجه حاجات في نفسها مأخراها وهي مش واخدة بالها منها..
بعد كدة العلاج كان أسهل كتير بعد ما المقاومة دي ذابت.. احترمت فيها إنها على أد ما بتجادلني في جدوى التقنيات اللي بقترحها عليها .. على أد ما كانت بعدها بتلتزم بتجربتها.. كانت بتاخد وقتها فإنها تهضم وتجرب.. وتوصل لاستنتاج .. نتيجتها هي..اللي متفصلة عليها هي!
في يوم يبعد شهر أو شهر ونص عن أول يوم اتقابلنا فيه.. في التقييم اللي بعد الجلسة ال scores نزلت ل 2 !! وده كان إنجاز رائع ليا وليها.
