شافوا الدنيا بالألوان #4: "<؛:,.#$&*%.ْ".. بعد الترجمة..>> أنا بحبك!!
واحدة جميلة.. كانت بتجيلي وهي لسة والده.. البيبي على طول معاها في الجلسات.. أول ما بدأنا ال score بتاعتها في الاكتئاب كانت عالية جدا.. كانت بتشتكي إن علاقتها مع جوزها مش مستقرة، بيتخانقوا كتير، فيه مشكلة كبيرة في التواصل.. رغم الحب الكبير والاحترام المتبادل.. كانت شايفة إن علاقتها مع جوزها لما بتستقر.. هي كمان بتهدا وبتستقر..
فكان شغلنا على الاتنين.. الاكتئاب والعلاقات.. ازاي تحب نفسها من غير شروط، ازاي تكسر دايرة عدم الانجاز، ازاي تعلي ثقتها بنفسها..وفي الآخر ازاي تتواصل مع الناس، خصوصا مع جوزها..
اتعلمت الأسرار الخمسة للتواصل الفعال .. اتعلمتهم لحد ما اتقنتهم.. وكل حاجة رجعت زي الفل.. علاقتها بجوزها اتحسنت كتير.. ما بقتش خايفة من أي conflict أو نقاش ما بينهم.. بقت عارفة هتتصرف ازاي.. هترد تقول إيه.. وهتعبر عن نفسها ازاي..
آخر مكالمة ما بيننا .. قالتلي ال scores بتاعتي zero كلها.. (قصدها على الاكتئاب والقلق) .. المكالمة دي وهي في عز ضغط شديد عليها لظروف عندها.. رغم الضغوطات قدرت تحافظ على مزاجها وعلى علاقتها باللي حواليها.. اعتقد إن ده حصل لأن ميزة العلاج المعرفي السلوكي.. إنه يعتبر تغيير في نمط الحياة والتفكير.. فالتأثير بيبقى جذري ومستمر.
