شافوا الدنيا بالألوان #2....تحبي تواجهي الموت معانا!!؟
كانت قلقانة جدا.. بتفكر في حاجات كتير.. بتخاف من حاجات كتير ... وفيه حاجات معينة بتخوفها أوي.. زي فكرة الموت .. وأنا اتعلمت إن أكتر حاجة تموت الخوف هي المواجهة.. fear facing (مواجهة الخوف) .
. لما الواحد بيواجه مخاوفه.. سواء بشكل مباشر أو بشكل إدراكي .. بيعرف الحجم الطبيعي للشئ اللي خايف منه.. فقلقه يقل ويعرف يشوف حياته ويعمل اللي وراه..
طبعا في الحالة دي استخدمت المواجهة الإدراكية (cognitive exposure) .. ( ما اقتنعتش هي بالمواجهة الحقيقية .. معرفش ليه؟!!)
المواجهة الإدراكية .. بنحاول فيها نعيش التجربة بشكل أقرب ما يكون للحقيقة.. بنعمل وقفة (pause) عند الأفكار السلبية اللي بتدور في دماغنا .. بنرد عليها بمنطقيه.. بنتخيل أسوأ السيناريوهات .. بنكتشف هي ليه أصلا مخوفانا .. المخاوف والقلق عامل زي لغز ال (puzzle ) أول ما بتركبها صح.. الصورة الحقيقية بتبان .. وبتكتشف أد إيه أفكارك بس هي السبب في الخوف والقلق المبالغ فيهم .. الخوف والقلق اللي بيعجّزوا.. مش بيحموا!!
بعد مواجهة فكرة الموت.. بدأنا نواجه مخاوف تانية بنفس الطريقة وبطرق تانية كتير.. القلق والخوف اللي كان بيستهلك جزء كبير من تفكيرها ومن مجهودها قل جدا.. ورجعت تمارس حياتها بهدوء وبثقة.. ما بقتش تقلق لتخاف.. هي عارفة كويس أوي لو خافت أو قلقت زيادة عن اللزوم بعد كدة هتتصرف ازاي!
