شافوا الدنيا بالألوان !!

أكتر حاجة حلوة في إني طبيبة نفسية إن الناس بتفتحلي قلبها.. بيحكولي عن أدق تفاصيل حياتهم..بياخدوا رأيي في مشاكل حساسة جدا.. بيشاركوني أسرار ما حدش يعرفها عنهم ..بيستأمنوني على الجوانب الخفية في أفكارهم ومشاعرهم.. مش بس كدة.. بيسمحولي كمان إني أساعدهم يتعاملوا مع هذا الجانب المستتر.. بكل اطمئنان واستسلام من ناحيتهم.

على أد ما ده شئ بيفرحني وبيحسسني بالرضا عن نفسي إني على الطريق الصح.. بأدي رسالتي اللي أظن إن ربنا خلقني ليها.. على أد روعة الموضوع ده.. على أد ما بحس بالخوف من المسؤولية اللي اتوكلت ليا يوم ما واحدة بتيجي تعمل معايا جلسات..

في بداية الجلسات.. العميلة بتبتدي تتكلم عن مشاعر سلبية متكررة هي حاسة بيها.. أو عن تجربة سيئة هي عدت بيها.. وفي معظم الأحيان ده بيبقى مصحوب بدموع.. وعياط .. ساعات انهيار..لحظة الكشف عن ال dark side (الجانب المظلم) من أصعب اللحظات عليا!!.. أنا بحس ب heart ache (وجع وعصرة في قلبي) .. وساعات مش بعرف أمسك دموعي..

هنا بقى ييجي التحدي.. ازاي أقدر أساعد الإنسانة دي إنها تنتقل من الحالة دي (الحزن.. العياط.. الانهيار) لحالة (السعادة.. الرضا.. الاطمئنان..الثقة في النفس..) ازاي أقدر أعمل كدة من خلال كلامي معاها.. ازاي أشيل النضارة السودا.. ازاي أخليها تشوف الدنيا بالألوان!

في بداية شغلي في السايكوثيرابي.. كنت بحقق نتايج كويسة.. أو ده اللي كنت بادّعيه.. بقول بادّعيه عشان عمري ما أعرف أجزم إن ده حصل.. ببساطة لأن مفيش حاجة أقيس بيها شغلي.. مفيش تحليل أعمله أقدر أتأكد منه إن التعب النفسي ده راح!

فبضطر أعتمد على إحساسي.. وكلام الشخص اللي قدامي.. واللي طبعا مضلل بشكل كبير.. يعني أنا ممكن أبقى شايفة إنها بقت زي الفل وبرافو عليا.. ومع ذلك هي مصممة عكس كدة.. أو هي مكسوفة مني وبتجاملني.. فانا أفتكر إنها اتحسنت وده يطلع مش حقيقي.. أو العكس!! أبقى فاكرة إني فشلت.. في حين إنها فعلا اتحسنت!! ومش بعرف أحدد دايما إيه اللي اتحسن وإيه اللي لسة محتاج شغل..

الكلام ده اتغير من ساعة ما طبقت نظام جديد في جلسات العلاج النفسي.. اعتمدت نظام اسمه T.E.A.M ده نوع من ال CBT (العلاج المعرفي السلوكي) ولكن بشكل منظم جدا جدا.. النظام ده بيوفرلي حاجة مش موجودة عند بقية المعالجين النفسيين.. وهي ال testing (الاختبار).. ببساطة.. قبل ما ببدأ كل جلسة بعمل اختبار نفسي للعرض اللي جاية تشتكي منه العميلة.. (فرضا... الاكتئاب) اختبار مختصر نعمله قبل الجلسة وبعد الجلسة.. والكلام ده بنعمله كل جلسة.. فاقدر أقيس بيه بشكل واضح مدى التحسن اللي بيحصل.. وإذا كان بيحصل تحسن أصلا وللا لأ .. وإيه الحتة اللي محتاجة شغل فنركز عليها..

دلوقتي بس أقدر أشارككم بعض قصص نجاحي مع الناس.. لأني بكل ثقة أقدر أقول إني قدرت أساعدهم في التخلص من التعب النفسي اللي كانوا جايين يشتكوا منه..مش بس من ال feedback الل بيجيلي منهم.. ولا من شكلهم ولا نبرة صوتهم الي بقت مليانة سعادة وتفاؤل.. لأ ده بنتايج الاختبارات كمان!!

اقرئي القصص من هنا >> شافوا الدنيا بالألوان!! >> القصة الأولانية