إيه اللي بيحصل لما الواحد يكون مكتئب؟!

الحاجات اللي جاية دي هي أعراض الاكتئاب، وكل ما حياتك تتأثر أكتر ووظيفتك تتعطل.. كل ما ده يعبر عن شدة وعمق الاكتئاب.

أول حاجة.. على مستوى المزاج:

تحسي إنك مودك وحش معظم الوقت، مخنوقة، عصبية، مش طايقة نفسك، مش طايقة ولا مستحملة أي ضغط.. شايفة الدنيا سودة، شايفة إن مفيش أمل، مفيش فايدة في أي حاجة.. مهما كانت الدنيا حواليكي كويسة، انت شايفاها وحشة ومش مستطعمة أي حاجة، حتى لو عندك حاجات كانت تبسطك زمان هتلاقيها ولا تفرق معاكي دلوقتي.. مش متحمسة تعملي حاجة.. حتى لو الحاجة دي مهمة أو ممكن تكون مسلية، برضو لأ.. مش بتتحمسيلها!!

شايفة نفسك قليلة، ماعندكيش ثقة في قدراتك ولا في نفسك، حاسة بالذنب على طول.. ناحية نفسك أو ناحية اللي حواليكي.. وممكن تكوني بتفكري في الماضي كتير ومحبوسة هناك.

تاني حاجة.. على مستوى العلاقات:

بتبقي منسحبة ومنعزلة، ولو أُجبرتي إنك تطلعي من الكهف بتاعك تلاقي نفسك بتتنرفزي بسرعة وتنفعلي بشدة، تبدأ علاقتك باللي حواليكي تتوتر بسبب إنعزالك عن ناس محتاجينلك مثلا.. أو غضبك المتكرر.. زي الناس في الشغل أو العيال مثلا.

تالت حاجة على مستوى الآداء والوظيفة:

بتبقي مش متحمسة تعملي حاجة ونفسك مسدودة وتعبانة ومرهقة طول الوقت.. بتسرحي وتفقدي تركيزك بسهولة.. بتسيبي الحاجات اللي وراكي وبتأجلي كتير.. حتى لو خروجة أو حاجة كانت بتبسطك قبل كدة مش بتتحمسي ليها وغالبا ما بتعملهاش.. ونتيجة إن حاجات كتير بتقع منك.. في وظيفتك وآدائك وإنجازك.. بتفقدي ثقتك في نفسك زيادة وتحبطي زيادة وتكتئبي زيادة.. لحد ما تكسري الدايرة!!

*لو عايزة تعرفي ليه مهم إن الواحد يعالج الاكتئاب .. اقرئي المقال ده كمان >> أدينا عايشين!!